(డా. సమన్న ఈటల)

                                                      వెంటాడే జ్ఞాపకం

నిగనిగలాడే నల్లని జుట్టు

నక్షత్రాల్లా మెరిసే నీలి కళ్ళు

సన్నజాజిలా విరబూసి

పెదాల పై తారాడే చిరునవ్వు

కల్లాకపటం తెలియని పసిపాప మనసు

యవ్వన తేజంతో పసిడికాంతులీనుతూ

మనస్సు రంజింపజేసే మనోహర రూపం

అరమరికలు లేని హృదయంతో

ఆకట్టుకునే ఆత్మీయపు పలకరింపు

వెల్లువలా ఉప్పొంగే మమతతో

నయనాలు వెలిగే ప్రేమమూర్తి

విధి ఆడిన వింత నాటకంలో

అమెరికా గడ్డపై అర్ధాంతరంగా

నెలరాలిన మా నయనతార!

గుర్తుకొస్తే చాలు...

          గుండె బిగ్ బ్యాంగ్ లా విస్పోటం చెంది

          కన్నులు నయాగరా జలపాతాలై

          హృదయమంతా గాయాల జల్లెడౌతుంది

తలుచుకుంటే చాలు...

          మనసంతా వేదనా భరితమై

          విషాదమే ఉచ్హ్వాస నిశ్వాసలై

          ప్రాణం ఆరిపోయే ప్రమిదవుతుంది

          చెరగని వాడి స్మృతి వెంటాడే జ్ఞాపకమై

          గుండె నిండా మానని పుండై

          జీవితాంతం వీడని విషాదమవుతుంది !!

నిశాంత్ స్మృతిలో... నాన్న - (డా. సమన్న ఈటల)